ملخص الحلقة الأولى من مسلسل عهد أنيس
بتبدأ الحلقة الأولى في عشرينيات القرن الماضي، لما بيظهر شخص غريب اسمه “أنيس” في قرية مصرية، وبيطلب يقابل الشيخ الشازولي، اللي بيعتبر كبير القرية. أنيس بيقول إنه ناوي يعيش في القرية واشترى بيت فيها، وبيقول كمان إنه بيشتغل في المواشي والجزارة، وناوي يفتح مشاريع تشغل أهل البلد.
الشيخ الشازولي رحّب بيه، لكن أنيس فاجأه بطلب غريب: عايز يتجوز بنته! الشيخ قاله إنه لازم ياخد رأي العيلة، وبعدها وافق، وفعلاً اتعمل فرح كبير. لكن اللي حصل بعد الجواز كان مريب، لما قال أنيس لعروسته إنه ناوي يملأ الأرض من نسله!
في الحلقة التانية، الأحداث بتنتقل لسبعينيات القرن الماضي. بنتعرف على الشازولي (الابن أو الحفيد)، اللي متجوز من زوزو، وعندهم طفلين. حياتهم هادية، لكن بيتضح إن الشازولي مهتم بالسحر وبيقرأ في كتب زي “شمس المعارف”، وده بيزعج مراته جدًا.
صديق الشازولي “شيخون” بيشوف أنيس على شكل عفريت، وبيظهر له ومعاه نسخة أصلية من “شمس المعارف”. لما الشازولي شاف الكتاب، اتصدم، وبدأ يقراه في السر. زوزو اكتشفت الكتاب، وواجهته، لكن الأمور اتصاعدت لما جابت شاكوش تحاول تكسر الدولاب اللي عليه طلاسم، ودخلوا في خناقة، لحد ما زوزو وقعت من البلكونة وماتت!
بعد وفاتها، والدها أخد الولاد، واتهم الشازولي إنه السبب. الشازولي رجع البيت، وبدأ يستخدم مخطوطات سحرية، وفي اللحظة دي ظهر أنيس من جديد، وكانت نهاية الحلقة صادمة ومفتوحة!
