اتوتر من ظروف الوقت وعيوني شقيه

والعيون تبين اللي داخل القلب الشقاوي

احسبني مستعد لكل شي ولاعليه

لين طحت الطيحه القشرا ولا طحت امتساوي

طيحت اللي كيد بعد من حدود الجاذبيه

قبل يفرح ف اختراق الجو جاه امرن سماوي

مع ظلام الليل تسري بي هواجيسن قويه

تختطفني من مكاني واصبح بدارن خلاوي

الهموم بداخلي سوت مشاكل فوضويه

ودي اهرب بس يا للاسف ماني بقاوي

يا بدويه عالجيني و انقذيني يا بدويه

انتي اللي جارحتني وانتي لجرحي مداوي

بحت الصوت ادخلتني في مشاكل عائليه

صنفوني بعدها غاوي وانا ماني بغاوي

سيئتك حسنه وحسنة غيرك من الناس سيئه

هكذا نبض المشاعر والفؤاد اصدر فتاوي

عمري وقلبي وما املك فدوتك واغلى هديه

يابعد من يستحق من المحبين الهداوي

وان تخيلتك تراودني مشاعر داخليه

يمكن انظر غصن بان وعود موز ودهن جاوي

اخط فيني واكتبيني معك مجهول الهويه

واعمي عيوني وفكري عن عبير وعن مضاوي

كان قيس ارخص حياته لجل حب العامريه

حبنا مع حبهم يرجح ولايمكن يساوي

لو ارد دونك حياض الموت وسهوم المنيه

اعتبرني منتحر دونك وانا قد الهقاوي

معك تربطني مواثيق العهد والعنصريه

و اتعزوا فيك فالشده وابالغ فالعزاوي

والعيون الحور تثر فالقلوب العاطفيه

وانت عينك مايقاومها قسى القلب القساوي

حبي لغيرك مزيف وانت حاجه واقعيه

تزهرين بقلبي اللي من هواء غيرك سناوي